( امى )
من ديوان ثورة عاشق
عن دار أفاتار للطباعة والنشر
شعر ...
أحمد التبيني
امى يابنت الارض
ياصاينه العرض..
وعاشقه الفرض
ولا اثر فيكى لهيب الشمس
وتعب الكبد..
كان صومك دعوات بتحس
وتبعت ود
وكأنك رابعه العاشقه الخالق
عشق بجد
كان صومك زهد..
حكاياتك كات سكه وواضحه
واخدت انا منك بكالوريوس ف الدين والفقه..
ف عرفت ازاى اجدد دينى
وايه التوحيد
لما اقرا الاخلاص بحنينى
واسرح لبعيد
فى اللى مايخطرش ف يوم على قلب عبيد..
مع إنك مادخلتيش كليه
ولا حتى معاكى ابتدائيه..
استاذك " قرآن "
من غيره المتعلم
ساقط وبليد..
شهداتك عدت كل حدود العلم
كات احلى شهاده اخدتيها
لحظة مانطقتى باول ركن بقلب سليم
من غير الدكتور مايقولِك
الثابت جواكى اهو دلك من غير تلقين..
وانا شفتك ف الرؤيه امبارح
من بعد سؤالى والحاحى
امى راحت فين
شفتك ف الرؤيه مع الشهداء
لابسه ابيض ف ابيض
وسط الرياحين..
امى..وحشتينى ازيك
سامحينى ماجيتش بقى لى كتير
تعبان من بعد ماسبتينى..وناقصنى كتير..
وانا عارف انى مقصر ف الزيارات
سامحينى ياامى على التقصير..
اصل الاحوال..لا كانت ع البال
ولا ع الخا طر
والدنيا معايا قوى معانده والحال مايسُر
وبداوى ف ازمه واطيب منها
تيجى وتجرحنى كتير ازمات..
من بعدك معدِيتش البركه
واتحرمت عيشتى من الدعوات
وبشيل ف همومى على كتافى
ايشى هم وغم..وحرقة دم
والحوجه ياامى ماهش لفلوس
الحوجه ياامى ان انا محروم من حضن وضم..
وديونى بتتفرط شطرات..
وبفضفض بيهم ف الندوات..
ماانا اصل ياامى مابرتاحش
غير لما عيونى تدمع شعر
ماهو اصل الدمع مداد قلمى من بعدك زاد..
لأ قل الزاد
ولا زاد من بعدك غير المى
ويادوبك عايش كده بالكاد..
لا اكلت رغيف بيتى ف بيتى
ولا شيء يشبه منك حاجه..
ولا اكل فيه ريحتك ياعنيا وحلاوة الطعم
ياااه على اكلك يامايا
على باب الشارع كنت بشم
الله رح ناكل ملوخيه
دلوقت ادينا اتفرقنا.مين بعدك لم؟!
وحشانى بجد.. مش قد الدنيا وقد البحر
قد طواف الناس للكعبه ..وقد الطهر
والكتف اللى اتمنى يشيلك شيل..
قد الحرمان من نظره اخيره وحضن طويل..
ماانا يامه اما شفايفى إتمدت
نامت على ايدك لتنين
ماقالتش ان دى صوره وذكرى
ووداع للبركه ودعوات مقبوله ماتتردش..
ماقالتش عيونك ليا دى اخر مره
اويمكن مافهمتش..
معلش حبيبتى مافكرتش
ماعرفتش ان الحب مسافر وانا ودعته..
ون ف يوم رح ياخد ربى وديعته..
لو كنت عرفت..كنت قعدت ابوس رجليكى..
واتوضا ياامى بضى عنيكى
واصلى عليكى
مالحِقتش..وعيونى بتتلفت شارده
كده يعنى خلاص
مش رح اشوفك تانى ياحاجه ..
ولقيتنى بدمع..بس مادمعتش شعر
قلت " الرحمن "
على روحك يامه وكترت الذكر
ليست هناك تعليقات:
إرسال تعليق