==============مش هيه دى الشوارع
##############################
مش هيه دى الشوارع
ولا...دا الشجر
غنا العصافير سرقوه
ولا غدر
هربت نسايم فجرنا اللى كات
بتحلم
بخدود حبيبى ينورها قمر
مش دى الوشوش الطيبة
ولا دى ابتساماتهم
لحزن بيرسم تجاعيد فى وشى القدر
كلن الوشوش حجر
بنحكى عن ليل اسود وسفر
الشوارع ساكتة مستنية مطر
مستنية حبيبتى
لما تضحك تهز فى القلب الف وتر
كنت واقف جنب عمود مستنى الاشارة
مستنى م النجمة البعيدة الامارة
بس ليه العمر مر من جنب الامل
وسابنا حيارى
كنت بتأمل فى كل تفاصيل الوجوة
اشوف انكسار ملفوف فى ضحكة
اقول خسارة
الورد فى اخر الربيع بيكون حجارة
والامانى بتحضن اغنياتها
وتدارى فى كام ستارة
ملامح بايشة فى برواز قديم
ودمعتين على خدود اليتيم
بتقول فين الجدارة
فين اللى يرسم ضحكتين
وبيت ونخلة عالية ويكون شرارة
مين اللى يقطع ستاير الليل
ويحضن نهار الحلم
يا بخته اللى دفن اخر تفاصيل الهم
ياللى انت نايم مخنوق
ما عارف كيف الامانى تتلم
الشمس اكبر عبور تنجى بيه من الغم
=============محمد عبدالمقصود داود=======
ليست هناك تعليقات:
إرسال تعليق